Рубоиёт. Абуабдуллох Рудаки

Ruboiёt. Abuabdulloh Rudaki

Ҷойе, ки гузаргоҳи дили маҳзун аст,

Он ҷо ду ҳазор найза болои хун аст.

Лайлисифатон зи ҳоли мо бехабаранд,

Маҷнун донад, ки ҳоли Маҷнун чун аст!

Рӯят дарёи ҳусну лаълат марҷон,

Зулфат анбар, садаф даҳан, дур дандон,

Абрӯ каштию чини пешонӣ мавҷ,

Гирдоби бало ғабғабу чашмат тӯфон.

Чун кори дилам зи зулфи ӯ монд гиреҳ,

Бар ҳар раги ҷон сад орзу монд гиреҳ.

Уммед зи гиря буд афсус, афсус,

К-он ҳам шаби васл дар гулӯ монд гиреҳ!